+
Ang isa ba sa inyo ay may sakit? Ipatawag niya ang mga saserdote [Latin: sacerdotes; Griyego: presbyteros; mga pari] ng iglesia... (Santiago 5.14). May sakit, ibig sabihin:
1) yaong may mga malulubha o mga nakamamatay na sakit upang sila ay pag-ukulan ng panalangin at mapahiran ng banal na langis (Sakramento ng "Extreme Unction", cf., pagpapatuloy ng v.14); o,
2) maaari din naman na yaong mga may hindi maipaliwanag na mga nararamdaman matapos ang pagsusuri ng mga mediko o mga manggagamot na dalubhasa sa siyensiyang medikal - kabilang ang mga "psychiatrists" (hindi maaring isantabi ang kanilang paglilingkod, cf., Ecclesiasticus, Sirach sa mga saling di-Katoliko, 38.1); kabilang din dito ang mga biglaan na kaguluhan sa mga relasyong personal. Patungkol sa kapangyarihan ng mga ministro ng Santa Iglesia sa mga bagay na ito, maliwanag ang sinasabi ng Banal na Kasulatan: Binigyan ko kayo ng kapangyarihan na yurakan ang mga ahas at alakdan, at sa lahat ng kapangyarihan ng kaaway... at pagalingin ang lahat ng uri ng karamdaman, at lahat ng uri ng kahinaan (Lucas 10.19; Mateo 10.1). Samakatwid, hindi mga 'espiritista', hindi mga 'faith healers' at hindi mga albularyo ang may kaloob na kapangyarihang galing sa Panginoon para humarap sa mga bagay na ito.
Huwag kayong palinlang sa tusong diyablo na kayang makapagdulot ng kaginhawahan - panandaliang kagalingan - at nagkakaloob din, sa kanyang panggagaya sa Diyos, ng ganitong mga kakayahan sa mga taong bukas sa kanyang impluwensiya at gumamit pa ng mga imaheng Katoliko (na hindi benditado o nabenditahan man ngunit ayon sa makabagong Ritwal) upang makapanlinlang nang mailayo lalo na ang mga binyagan sa mga Sakramento ng Santa Iglesia. Lahat ng di ayon sa Pananampalataya [na ang saligan ay ang Salita ng Diyos - nasusulat o hindi (saling-aral na pasalita), cf., 2 Tesalonika 2.14] ay kasalanan (Roma 14.23). Kasalanan, ibig sabihin, hindi sa Diyos.
No comments:
Post a Comment